Wareegto kasoo baxday xafiiska wasiirka dastuur iyo arimaha federalka xoosh jabriil ayaa lagu sheegay in uu kala diray gudiyadii dastuurka.
Wasiirka Dastuurka iyo arrimaha Federalka ayaa sheegay in uu kala diray guddiga Madaxa Banaan ee Dastuurka iyo guddiga quburada Dastuurka oo uu sheegay in uu waqtigoodii dhamaaday.
Kaddib Warqad kasoo baxday Xafiiska Wasiirka Dastuurka iyo arrimaha Federalka ee Xukuumadda KMG Soomaaliya C/raxmaan Xoosh Jabriil ayaa lagu sheegay in la kala diray labada guddi ee kala ah guddiga Madaxa Banaan ee Dastuur iyo guddiga Qubarada oo uu tilmaamay in uu dhamaaday Waqtigoodii iyo Kaalintii ay ku lahaayeen arrimaha Dastuurka.
Warqadda ayaa lagu sheegay in Heshiiskii Addis ‘Ababa lagu sameeyay guddi kuwaasi oo hadda uu horyaallo Dastuurka oo dhameystiran taasi oo aheyd mid horey loogu soo heshiiyay, waxaana qoraalka sidoo kale lagu sheegay in illaa 2006-dii ay soo jireen qaar ka mid ah guddiyadaasi, islamarkaana ay muhiim aheyn inay iska sii jiraan, iyadoo dadka Saxiixay heshiiskaasi uu ka mid ahaa Madaxweynaha dowladda KMG ah Soomaaliya sida ku xusan Warqadda.
Dhinaca kale Warqad iyana kasoo baxday Xafiiska La taliyaha Sharciga Madaxweynaha oo ku wajahneyd Madaxda dowladda iyo Xubnaha beesha Caaalamka ayaa lagu sheegay in Wasiirka uusan awood u laheyn in uu kala diro guddiyadaasi.
Warqadda oo uu ku saxiixnaa Abuukar Xasan Axmed oo ah la taliyaha Sharciga Madaxweynaha ayaa waxa lagu sheegay in Wasiirka Dastuurka iyo arrimaha Federalka ee Xukuumadda KMG Soomaaliya uusan kaligiis awood u laheyn in uu kala diro Labada guddi ee ah guddiga Madaxa Banaan ee Dastuur ka iyo guddiga Qubarada, arrintaasina ay tahay mid sharci darro ah.
Warqaddaani oo ka koobneyd illaa 6-qodob ayaa lagu sheegay in iyadoo la iska illaalinayo in lagu xadgudbo sharciga loo baahan yahay in wax waliba oo ku aaddan arrimaha Dastuurka ay u baahan yihiin in loo dad badsado islamarkaana loo baahan yahay in Madaxweynaha uu si toos ah ula socdo arrimahaasi.
Ugu dambeyn Warqadda kasoo baxday Xafiiska Madaxweynaha ayaa lagu sheegay in labadaasi guddi lagu kala diri karo oo kaliya Dikreeto kasoo baxday Xafiiska Madaxweynaha.
Wasiirka Dastuurka iyo arrimaha Federalka ayaa sheegay in uu kala diray guddiga Madaxa Banaan ee Dastuurka iyo guddiga quburada Dastuurka oo uu sheegay in uu waqtigoodii dhamaaday. 
