Qaraxyo miino oo sababay dhimasho iyo dhaawac ayaa gaadiid ay saarnaayeen ciidamo ka tirsan dowladda KMG Soomaaliya waxaa maanta lagula eegtay degmooyinka Waaberi iyo X/weyne ee gobolka Banaadir.
Qaraxaani oo ahaa miinada nuuca dhulka lagu aaso ayaa lagula eegtay gaari Runeet ah oo ay saarnaayeen ciidamo ka tirsan dowladda KMG Soomaaliya agagaarka masjidka Calu Bulaay ee degmada Waaberi, waxaana qaraxaasi ku geeriyooday 2 askari oo ka tirsanaa ciidamadii saarnaa gaarigaasi halka sedax kalana ay ku dhaawacmeen kuwaasi oo ahaa dad rayid ah oo ku dhaawacmey rasaas ay fureen ciidamadii Qaraxa lala eegtay.
Goobta uu qaraxu ka dhacay ayaa waxaa isku gadaamay ciidamo kale oo ka tirsan dowladda KMG Soomaaliya oo daqiiqado kadib soo gaaray halka uu qaraxu ka dhacay kuwaasi oo halkaasi ka bilaabay baaritaano xoogan oo ay ku baadi goobayaan dadkii ka dambeeyay qaraxaasi.
Goobjooge ku sugnaa goobta uu qaraxaasi ka dhacay ayaa Shabelle u sheegay in uu bur bur xoogan soo gaaray gaarigii ciidamada dowladda ee Qaraxa lala eegtay, waxaana uu intaasi ku daray in ciidamada dowladda ay dhinacyada u rideen rasaas farabadan taasi waxyeelo ay ka soo gaartay dad shacab ah oo goobta ka agdhawaa.
Intii ay socdeen howlgalada ciidamada dowladda KMG Soomaaliya ayaa waxaa hakad galay isku socodkii gaadiidka wadooyinka qarda jeexa ah ee Xaafadaha degmada Waaberi ee gobolka Banaadir.
Saacado kadib markii qaraxa iyo rasaasta ay fureen ciidamada dowladda ay ka dhaceen nawaaxiga Masjidka Cali Bulaay ee degmada Waaberi ayaa dadka Xaafadaha degmada Waaberi oo haatan gaadiidku ay dhex maraan waxaa ay bilaabeen inay guryahooda hor dhigaan dhagxaan waaweyn iyagoo baqdin ka qaba qaraxyo kale oo ay ku waxyeeloobaan caruurtooda ay ka hordhacaan guryahooda maadaama gaadiidka ka dhex shaqeeya inta u dhaxeysa isgoyska KM4 iyo X/weyne ay inta badan haatan isticmaalaan Wadooyinka qarda Jeexa ah.
Dhinaca kale Qarax isna lala beegsaday ciidamo ka tirsan dowladda KMG Soomaaliya ayaa duhurnimadii maanta ka dhacay arida degmada X/weyne ee gobolka Banaadir waxaana ku dhaawacmay labo askari oo ka tirsan ciidamada dowladda KMG oo la socday gaarigii qaraxa lala beegsaday.
Qaraxa kadib ayaa goobta waxaa soo gaaray ciidamo ka tirsan dowladda KMG Soomaaliya kuwaasi oo halkaasi ka sameeyay howlgalo walow aan la xaqiijin cid ay u soo qabteen qaraxii lala eegtay.
Qaraxyo miino oo sababay dhimasho iyo dhaawac ayaa gaadiid ay saarnaayeen ciidamo ka tirsan dowladda KMG Soomaaliya waxaa maanta lagula eegtay degmooyinka Waaberi iyo X/weyne ee gobolka Banaadir.
